உரிமையை தட்டிக் கேட்டும் தினமாக மேதினம் மாற வேண்டும்

30 வருட யுத்த காலத்தின் பின்னர் இந்த நாட்டில் இடம்பெறும் முதலாவது மேதினம் நாடு முழுவதுமாக நடைபெறுகிறது. மலையகத்தை பொறுத்தவரை மேதினம் ஒரு ஆலய திருவிழா, சடங்கை போல இடம்பெற்று வருகிறது.

மேதினம் தொழிலாளர்கள் தினமாகும். முதலாளித்துவத்திற்கு எதிராக எழும்பிய அலைககளினால் ஏற்படுத்தப்பட்ட தொழிலாளர் தினத்தின் வரலாறு நீண்டதோர் வரலாறாகும். தொழிலாளர்களின் அடிமைத்தன வாழ்வுக்கு எதிராக அமெரிக் சிக்காகோ நகரில் 1889 மே மாதம் 01 திகதி மேற்கொள்ளப்பட்ட எதிர்ப்பு ஆர்ப்பாட்டத்தின் விளைவாக ஏற்றபட்டதன் பயனே மே 1ம் திகதிய தொழிலாளர் தினமாகும்.

தொழிலாளர்களின் ஒற்றுமையின் விளைவாக 1890 மே 1ம் திகதி மாபெரும் ஆர்ப்பாட்டம் ஏற்பட்டது. இச் சம்பவத்தின் பின்னரேபல நாடுகளில் மே முதலாம் திகதி உலகத் தொழிலாளர் தினமாக ஏற்றுக்கொள்ளப்பட்டது.

ஆனால் இன்று மலையகத்தில் மேதினம் ஒரு கேலிக்கூத்தாக அதன் புனித தன்மைக்கு எதிராக இடம் பெறுகிறது. வெறுமனே வருடா வருடம் கோஷங்களை எழுப்பியவாறு ஊர்வலத்தை ஏற்படுத்துவதாலும் கூட்டத்தின் இறுதியில் புதிய தீர்மானங்களை நிறைவேற்றுவதாலும் எமது சமுதாயத்திற்கு இதுவரை எதுவுமே நன்மைகள் கிடைக்கப்பெற்றதாக தெரியவில்லை.
கடந்தகால மேதினங்களில் எழுப்பப்பட்ட கோஷங்களாலும் தீர்மானங்களாலும் என்ன பயனை எமது மக்கள் எட்டியுள்ளனர். தொழிற்சங்கத் தலைவர்களை மகிழ்விததது மட்டுமே எமது மக்களுக்கு கிடைத்த வரப்பிரசாதமாகும்.

மலையக பாட்டாளி மக்களின் உரிமையை தட்டிக்கேட்கும் ஒரு சந்தர்ப்பமாக மலையகத்திலும் மேதினம் மாற வேண்டும்.

ஏட்டிக்குப் போட்டியாக ஒவ்வொரு தொழிற்சங்கமும் தெருக்கூத்து நாடகங்களை நடடத்துவதுபால தலைவர்களின் செல்வாக்கை பிரதிபலிக்கும் நிகழ்வாகிவிட்டது மேதினம். தொழிலாளர்களின் உணர்வுகளை கொண்ட தொழிலாளர் தினமாக மேதினம் மாற்றம் பெற வேண்டும். வெறுமனே இந்திய சினிமா பாடகர்களையும் வெத்துவேட்டு தீர்மானங்களை கொண்டு மேதினத்தை நிரப்புவதைவிட எமது மண்ணுக்காகவும் தொழிலாளர் வர்க்கத்துக்காகவும் உயிர்நீத்த மலையக தியாகிகளுக்கு மரியாதை செலுத்தும் தினமாக மாற்றம் பெற வைக்க வேண்டும்.

இலட்சக்கணக்கான செலவுகளை செய்து பந்தா மேதினக் கூட்டங்களை நடத்துவதை விட்டு அச் செலவு பணத்தை கல்வி செயற்பாடுகளை மேற்கொள்ள முடியாதுள்ள மலையக மாணவ மாணவிகளுக்கு வழங்கினால் அதுவே எமது சமுதாயத்தின் அறிவுக் கண்கள் திறப்பதற்கான அத்திவாரமாக அமையும் நடைமுறைக்கு ஒத்துவராத செயல்களை கைவிட்டு நடைமுறை வழிக்கு ஏற்ற வகையில் எமது மக்களே மேதினத்தை மாற்றம் பெற வைக்க வேண்டும்.
எமது பாட்டாளி வர்க்க போராட்டத்தில் முதன் முதலாக 1939 ஜனவரி 12ம் திகதி முல்லோயா போராட்டத்தில் சுரவீர என்ற பொலிஸ்காரரால் கோவிந்தன் சுட்டுக் கொல்லப்பட்டார். இவர் முதல் மலையக மக்களின் போராட்டத்தில் கண்டி பல்லேகல தோட்டத்தை சேர்ந்த பழனிவேல்(1979) வi 36 தியாகிகள் உயிரை இழந்துள்ளனர்.

இந்த தியாகிகளை எந்தவொரு தொழிற்சங்கமோ அல்லது அரசியல் கட்சிகளோ மேதினத்தினத்திலாவது நினைவுகூராமை வருந்தத்தக்கதாகும்.

ஓவ்வொரு மேதினத்தன்றும் இத் தியாகிகளை நாம் நினைவு கூரல் வேண்டும்.
வெறுமனே மேதினத்தை ஒரு திருவிழாவாக கொண்டாடுவதால் எமது எதிர்கால சமுதாயத்திற்கு எவ்வித பயனுமில்லை.

அர்த்தபுஷ்டியான செயல்களில் எதிர்வரும் காலங்களில் நாம் செயற்படுவோம்.
அதன் மூலமாக எமது தொழிலாளர்களின் பலத்தை அடையாளப்படுத்துவோமாக

திண்ணனூரான்

சிலாபம்

மாணவி கடத்தல்

ஹட்டன் கொட்டகலை வெலிங்டன் தமிழ் வித்தியாலயத்தில் கல்விபயிலும் 13 வயது மாணவி ஒருவர் இனந்தெரியாதோரால் கடத்திச் செல்லப்பட்டுள்ளதாகத் தெரிவிக்கப்படுகிறது.

அவரது உடைகள் காட்டுப் பகுதியிலிருந்து கண்டெடுக்கப்பட்ட போதிலும், இதுவரை மாணவி கண்டுபிடிக்கப்படவில்லை என்று ஹட்டன் மனித உரிமைகள் தாபனம் தெரிவித்தது.

கடந்த 5ஆம் திகதி பாடசாலையிலிருந்து வரும் வழியில், முச்சக்கரவண்டியில் வந்த இனந்தெரியாதோர் மாணவியைக் கடத்திச் சென்றுள்ளதாகக் கூறப்படுகிறது.

அதன்பின்னர் ஸ்டொனிகிளிப் தோட்டத்தின் காட்டுப் பகுதியிலிருந்து மாணவியின் ஆடைகளும் புத்தகங்களும் கடந்த 3 நாட்களுக்கு முன்னர் கண்டெடுக்கப்பட்டுள்ளன.

இது தொடர்பாக அப்பகுதி மக்கள் உடனடியாகப் பொலிஸாருக்குத் தகவல் வழங்கியுள்ளனர். எனினும் இந்த மாணவி தொடர்பில் இதுவரை எந்தவித தகவலும் கிடைக்கவில்லை எனப் பெற்றோர் தெரிவித்துள்ளனர்.

இந்தச் சம்பவம் தொடர்பில் ஹட்டன் மனித உரிமைகள் தாபனத்திலும் ஹட்டன் பொலிஸ் நிலையத்திலும் முறைப்பாடு செய்யப்பட்டுள்ளது.

தோட்டத்திற்குள் புகுந்த பெரும்பான்மை இனத்தவர்களின் தாக்குதலால் நால்வர் காயம்

நிவித்திகலை பொலிஸ் பிரிவிற்குட்பட்ட பின்னகந்த மகாவெல தோட்டத்திற்குள் புகுந்த பெரும்பான்மை இனத்தைச் சேர்;ந்த சிலர் குடிபோதையில் அங்குள்ள தமிழர்களை தாக்கியுள்ளதோடு அவர்களின் வீடுகளையும் சேதப்படுத்தியுள்ளனர். இச் சம்பவத்தில் காயமடைந்த நால்வர் இத்தினபுரி வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.

இச் சம்பவம் குறித்து தெரியவருவதாவது நீண்டகாலமாக இத் தோட்டத்திலுள்ள காணியை வெளியார் அத்துமீறி கைப்பற்றி வருவதாகவும், இதற்கு எதிர்ப்பு தெரிவிக்கும் தோட்டத் தொழிலாளர்கள் தாக்கப்படுவதாகவும் தெரிவிக்கப்படுகிறது. இச் சம்பவத்தைத் தொடர்ந்து பெரும்பாலான தொழிலாளர்கள் அங்கிருந்து வெளியேறிவிட்ட நிலையில் சொற்ப எண்ணிக்கையிலானவர்களே அங்கு வசித்து வருவதாகவும் தெரியவருகிறது.

இத் தாக்குதல் சம்பவம் தொடர்பாக நிவித்திகலை பொலிசில் முறைப்பாடு செய்த போதிலும் தோட்டத் தொழிலாளர்களுக்கு முறைப்பாடு செய்ய அனுமதிக்கப்படவில்லை எனவும் மாறாக தொழிலாளர்கள் விசாரணைக்காக தடுத்து வைக்கப்பட்டதாகவும் தெரிவிக்கப்படுகிறது.
இது குறித்து முன்னாள் மாகாணசபை உறுப்பினர் ஏ.எம்.டி ராஜனின் கவனத்திற்கு கொண்டுவரப்பட்டதை தொடர்ந்து அவர் சப்ரகமுவ மாகாண பிரதி பொலிஸ் மா அதிபருக்கு அறிவித்தார். தொழிலாளர்கள் நிவித்திகலை பொலிசில் முறைப்பாடு செய்யவும் ஆவண செய்தார்.

மேம்படுத்தப்பட்ட தொழில் சூழல் மூலம் தொழிலாளர் பங்களிப்பு ஊக்குவிக்கப்படுகிறது

கிட்டத்தட்ட அரை நூற்றாண்டு கால தேயிலைத் தொழில், பிரித்தானியா சார்ந்த சம்பிரதாய பெருந்தோட்டத்துறையில் இருந்து விலகி நீண்டதூரம் வந்துவிட்டது.

பெருந்தோட்ட முகாமைத்துவ நிறுவனத்தின் அங்கத்தவரான ரேஜி ராஜியா, 1962ம் ஆண்டு இலங்கையின் பெருந்தோட்டத்துறையில் நுழைந்தார். அவர், பெருந்தோட்ட நிர்வாகியாக, தரகராக, இயக்குநராக மற்றும் கொள்வனவாளராக தேயிலை தொழிற்துறையின் சகல நிலைகளிலும், இலங்கையிலும் வெளிநாடுகளிலும் 45 வருட அனுபவம் உள்ளவர்.

இலங்கையின் சம்பிரதாய பெருந் தோட்டத் துறையில் இருக்கும் பெருந்தோட்ட வாழ்க்கை, நிலையான உற்பத்தி தாக்கத்திலும், இலாபத்திலும் சீரடைந்துள்ளது என்று இலங்கை பெருந்தோட்ட முதலாளிமார் சம்மேளனத்துக்கு அளித்த பேட்டியில் ராஜியா தெரிவித்துள்ளார்.

அன்று நாட்டிலுள்ள பிராந்திய பெருந்தோட்ட கம்பனிகளின் தோட்டங்களுக்கு அவற்றின் முக்கியமான சாதனைகளைத் தெரிவு செய்யும் பொருட்டு மேற் கொள்ளப்பட்ட சுற்றுப் பயணத்தை முடித்துக் கொண்ட பிறகு அவர் இக்கருத்தினைத் தெரிவித்தார். பெருந் தோட்ட மனிதவள அபிவிருத்தி நிதியத் தினால் நிர்ணயிக்கப்பட்ட அடிப்படை களுக்கு அமையவே இச்சாதனைகள் பற்றிய முடிவுகள் எடுக்கப்பட்டன.

“நிச்சயமாக முன்னேறுவதற்கு பல இடைவெளிகளிலிருந்தும் கடந்த 1980ம் ஆண்டுடன் ஒப்பிடுகையில் தோட்ட வாழ்க்கையில் குறிப்பிடத்தக்க மாற்றம் மனிதவள அபிவிருத்தி சம்பந்தப்பட்ட துறைகளிலும் காணக் கூடியதாக உள்ளது” என்கிறார் ராஜியா.
கம்பனி தோட்டங்களில் டிரஸ்டின் தலையீட்டினால் தோட்ட மகளிர் வாழ்க்கையில் பல முன்னேற்றங்களை காண முடிந்திருக்கிறது.
“எந்த விதமான காலநிலையிலும், கடினமான நிலப்பரப்பில் கொழுந்துகளை பறிக்கும் விசேட தொழிற்றிரன் படைத்த அதேநேரம் அப்பெண்கள் துவைத்தல், விறகுகள் சேகரித்தல், உணவு தயாரித்தல், குழந்தைகளை பராமரித்தல் போன்ற வேலைகளையும் செய்ய வேண்டியிருக்கிறது ராஜியா என்றார். இன்று

“ஆனால் இன்று, முன்னேற்றமடைந்துள்ள குடும்ப வசதிகளாலும் சமூக அந்தஸ்தாலும், கௌரவிக்கப்படுவதாலும் தோட்டப் பெண்களின் வாழ்க்கையில் பல மாற்றங்கள் அரும்பத் தொடங்கியுள்ளன.” என்றும் ராஜியா கூறுகிறார்.

தோட்டங்களின் முக்கியமான துறைகளான சுகாதார பராமரிப்பு, சிறுவர் அபிவிருத்தி, குடியிருப்பு அபிவிருத்தி, வதிவிட மற்றும் சமூக அபிவிருத்தி போன்றவை முன்னேற்றம் அடைந்துள்ளது.

உதாரணமாக மது போதைக்கு அடிமையானோர்களுக்கு, கூட்டுறவு சங்கங்கள் மூலம் அறிவுரை வழங்குதல், வீட்டு நிதி பராமரிப்பு, வங்கியிடுதல் மற்றும் சேமித்தல், கால்நடை வளர்ப்பு, வருவாய் பெருகக் கூடிய எடுத்துக்காட்டாக சிகை அலங்கார நிலையம் போன்ற தொழில்துறைகளுக்கு கடன் வழங்குதல் போன்றவற்றில் டிரஸ்ட் எடுபட்டுள்ளது. இச்சங்கங்கள் மூலம் தொழிலாளர்களது பிள்ளைகளுக்கு கல்வி கற்பதற்காக நிதியுதவியும் வழங்கப்படுகிறது.

வீட்டு சௌகரியங்களுக்கு தேவையான வசதிகள், சூரிய ஒளி மூலம் மின்சாரம், சுடுநீர், தொழிற்சாலையிலும் வெளிக்களத்திலும் ஓய்வு அறைகள், முதியோர் இல்லம் மற்றும் கலாசார தேவைகளை கருதி சில பெருந்தோட்ட மாவட்டங்களில் மயானங்களையும் டிரஸ்ட் அமைத்துத் தந்துள்ளது.

“தேசிய மயமாக்கப்பட்ட நாளிலிருந்து, பெருந்தோட்ட சமூகத்துக்காக கட்டாயச் சேவைகளை முன்னேற்ற தீவிரமான நடவடிக்கைகள் எடுக்கப்பட்டது. ஆனால் தற்போது கம்பனி தோட்டங்கள் இதைவிடவும் முன்னேறியுள்ளன. தற்போது விசேடமான சேவைகள், சிறந்த முறையான கட்டமைப்பில் தோட்ட குடியிருப்பாளர்களுக்கு வழங்கப்படுகிறது. சில நேரங்களில் அயல் கிராமப்புற சமூகங்களுக்குக் கொடுக்கும் விதத்தில் சலுகைகள் நிரம்பி வழிகின்றன” என்கிறார் இவர்.

அநேக தோட்டங்களில் உள்ள 0-5 வயதெல்லையையுடைய சிறுவர் அபிவிருத்தி நிலையங்கள் சமூக கட்டமைப்புடன் உபகரணப்படுத்தப்பட்ட பிரிவுகளுடன் பயிற்சியளிக்கப்பட்ட தராதரமுள்ள உத்தியோகத்தர்கள் மூலம் முகாமைப்படுத்தப்பட்டதாகும். இன்றைய காலகட்டத்தில் அனேகமான நிறுவனங்களில் நிகழும் குழந்தை பிறப்புக்களின் போது, தாய்மார்களுக்கு உரிய ஊட்டச்சத்தும், பிரசவ பராமரிப்பும் வழங்கப்படுகிறது. இன்று இறப்புகளின் எண்ணிக்கை தேசிய கணக்கிற்கு உட்பட்டதாகவே உள்ளது.
கூடுதலான இளைஞர்களும் இள வயதினருமே புதிய வசதிகளுடைய வீடமைப்பு குடியிருப்புகளில் குடியேறுகின்றனர். இது அவர்கள் தனித்தனியான வீடமைப்புகளை ஏற்றுள்ளனர் என்பதை உறுதிப்படுத்துகிறது. வயது முதிர்ந்தோர் இம்முறைமையை ஏற்றுக்கொள்ள காலம் எடுக்கலாம். ஆனால் இது முன்பைவிடவும் மிகப்பெரியதொரு முன்னேற்றமாகும். அதிகமான தகராறுகள் நீர் குறைவினாலும், கூரை ஒழுக்கினாலும், வதிவிட குறைபாடுகளாலுமே ஏற்படுகின்றன” என்கிறார் ராஜியா.

பிராந்திய கம்பனி தோட்டங்கள், சர்வதேச மட்டத்தில் ஏற்றுக்கொள்ளப்பட்ட நவீனமயமான தரக்கட்டமைப்பாகிய சுகாதார, பாதுகாப்பு நடவடிக்கைகள் மற்றும் சம்பந்தப்பட்ட தரச்சான்றிதழ்களுடன், தொழிற்சாலை அபிவிருத்தியை நடைமுறைப்படுத்தி வருகின்றன.
இத்தொழிற்சாலைகள் மேம்படுத்தப்பட்டதன் மூலம் உற்பத்தித் திறனை அதிகரித்துள்ளதுடன் சுத்தமான, ஒழுங்கமைக்கப்பட்ட தொழில் சூழ்நிலை மூலம் தொழிலாளிகளின் பங்களிப்பு ஊக்குவிக்கப்படுகிறது. தொழிற்சாலை ஓய்வறை உட்பட இவைபோன்ற செயற்பாடுகள் இலங்கை தேயிலையின் தரத்தை மேம்படுத்த நடவடிக்கைகள் மேற்கொள்ளப்படுகின்றன.

கம்பனி தோட்டங்களில் பொதுவாகக் காணப்பட்ட வேலை செய்யும் நிலைமை வெகுவாக மாறி நல்ல நிலையை அடைந்துள்ளது. தற்போது தோட்ட முகாமைத்துவம், தொழிலாளர்களது கண்ணியத்தினை அடையாளம் கண்டுகொள்வதை அதிகரித்துள்ளதுடன் உடன்பாட்டுடனான சூழ்நிலையை ஏற்படுத்தி வருகிறது.

“ஆரம்பத்தில் இது ஒரு கொடுங்கோலான அமைப்பாக இருந்தது. தற்போது தோட்டங்களை நிர்வகிப்பதில் கலந்தாலோசிக்கும் அணுகுமுறை பின்பற்றப்படுகிறது. ஒவ்வொரு தோட்டத்திலும் தோட்ட கண்காணிப்பாளர், தொழிலாளர் தொழிற்சங்க பிரதிநிதிகள் உள்ளடக்கப்பட்டு தொழிலாளர் செயற்குழு உருவாக்கப்பட்டுள்ளது. இம்மாதிரியான செயற் குழுக்களில் தற்போது பெண்களும் பிரதிநிதிகளாக இணைத்துக் கொள்ளப்பட்டுள்ளனர். இது முன்னேற்ற வழியின் பெருமாற்றமாகும். இந்த செயற்குழுக்கள் மூலம் தொழிலாளர்களது தகராறுகள் சுமுகமாக பேசித்தீர்க்கப்படுகிறது. இதன் மூலம் தகராறுகளில் வீணாக்கப்படும் நேர விரயம் மற்றும் வேலை நிறுத்தங்கள் தவிர்க்கப்படுகின்றன” என்று சொல்கிறார் ராஜியா.

(இலங்கை பெருந்தோட்ட முதலாளிகள் சம்மேளன ஊடக வெளியீடு)
நன்றி- தினகரன் வாரமஞ்சரி

கம்பனிகளின் வருகையின் பின்னர் தொழில் ரீதியாக நசுக்கப்படும், சலுகைகளை இழந்து வரும் தோட்டத் தொழிலாளர்கள்

மலையகத்தில் குறிப்பாக பெருந்தோட்டப் பகுதிகளில் வாழும் அநேகமானோர் தோட்டத் தொழிலாளர்களாக வாழ்ந்து வருவதை நாம் அறிகின்றோம் இவர்களில் ஆண், பெண் உட்பட பெரும்பாலானவர்கள் தேயிலைத் தோட்டங்களில் தொழில் செய்து தமது வாழ்க்கையை கொண்டு செல்வதே உண்மையான நிகழ்வாகும். இதில் இளைஞர் யுவதிகள் என்ற விதி விலக்கல்ல.

அநேகமாக தேயிலைத் தோட்டத தொழிலைத் தேர்ந்தெடுப்பதற்கு பல காரணங்களை முன்னெடுக்கலாம். இதில் தமது தேவைகளை பூர்த்தி செய்து கொள்வதையும் சில வரப்பிரசாதங்களுக்கு அடிமையாக விடுவதையும் கூறலாம் வரப்பிரசாதம் என்று இவர்கள் நினைப்பது தம் இருப்பிடத்துக்கான கூலி அறவிடப்படுவதில்லை என்பதையே. மேலும் நகரங்களில் பணம் செலுத்தி பெறுகின்ற குடிநீர், காற்று போன்றவற்றை இலவசமாக பெற்றுக்கொள்ளும் நிலை தோட்டப்புறங்களில் அதிகமாக உள்ளது. அதுவும் மரக்கறி தோட்டங்கள் மற்றும் கால்நடை வளர்ப்பு போன்றவற்றுக்கு வசதி உள்ளமையேயாகும்.

இது ஒருபுறமிருக்க இவர்கள் சுரண்டப்படும் விதங்களை அறியாதவர்களாகவே வாழ்ந்து வருகின்றார்கள் என்பது வேதனைக்குரிய விடயமாகும். இவர்கள் தொழில் ரீதுpயாக நசுக்கப்படுவது எவ்வாறு என்று நோக்குவோமானால் ஒரு தொழிலாளி வேலைத் தளங்களில் இருந்து வீடு திரும்பும் நேரம் மிகவும் தாமதகமாகவே இருக்கின்றமையை சுட்டிக்காட்டலாம்.
குறிப்பாக பெண் தொழிலாளர்கள் வேலை நேரம் அதிகரிப்பால் நசுக்கப்படுவது அநேகமான தோட்டங்களில் காணப்படுகின்றதொன்றாகும். மலையில் வேலை பார்க்கும் கங்காணிமார்கள் அன்றைய கால பெரிய கங்காணிமார்களை விட ஆதிக்கம் செலுத்துக்கின்றார்கள் என பல பெண் தோட்டத் தொழிலாளர்கள் இன்றும் குற்றம் கூறச் செய்கின்றார்கள் இதுவும் ஓர் ஆண் ஆதிக்கம் என்றே பலர் சொல்லி வேதனைப்படுகின்றனர்.

இன்று தேயிலைத் தோட்டங்களில் அநேகமாக இளம் யுவதிகள் வேலை செய்து வருவதை காணக்கூடியதாக உள்ளது. சில தோட்டங்களில் கங்காணிமார்கள் இளம் பெண்கள் என்றுகூட பார்க்காமல் தங்களை மலையில் வாய் கூசாமல் பேசுகிறார்கள். சிலர் தகாத வார்த்தைப் பிரயோகங்ககளை உபயோகிப்பதாக தோட்டப்புற பெண் தொழிலாளர்கள் விசனம் தெரிவிக்கின்றனர்.
கொழுந்து நிறுவையிலும் தங்கள் பாதிப்புக்களை அவர்கள் மறுக்கவில்லை. தற்போது சில தோட்டங்களில் உள்ள கொழுந்து நிறுக்கும் தராசுகள் பழைமை வாய்ந்தவையாகவும் உடைந்த, துருப்பிடித்த நிலையிலும் இருக்கின்றமையால் சரியான நிறுவையினை காட்டுவதில்லை என்றும் பெண் தொழிலாளர்கள் தெரிவிக்கின்றனர்.

இந்த பெண் தொழிலாளர்கள் தற்போது வேதன அதிகரிப்பின் பின்னர் ஒரு நாள் பேருக்கு(சம்பளத்துக்கு) சில தோட்டங்களில் 18 கிலோ கொழுந்து எடுத்தல் (தோட்டத்துக்கு தோட்டம் இது வேறுபடும்) வேண்டும். என நிர்வாகம் கண்டிக்கின்றது. இது போன்ற நேரங்களில் பெண் தொழிலாளர்கள் பெரிதும் பாதிக்கப்படுகின்றனர்.

இது இவ்வாறிருக்க தோட்டப் பகுதியிலுள்ள இன்றுள்ள பெண்கள் தொழிலாளர்கள் தேயிலை தொழிற்சாலைகளில் அதிகபட்சம் வேலை செய்வதை காணக்கூடியதாக உள்ளது. இவர்கள் தேயிலை தொழிற்சாலைகளில் இரவு நேர கடமைகளிலும் ஈடுபட்டு வருவதும் குறிப்பிடத்தக்கது.

குறிப்பிட்ட சில தோட்டங்களில் தொழிற்சாலை தொழிலாளர்களுக்கு வேலை செய்யும் போது பாதுகாப்பு கவசங்கள் சரியான முறையில் வழங்கப்படுவதில்லை. இதனால் ஆஸ்துமா போன்ற நோய்களுக்கு உள்ளாவதாகவும் சில பெண்கள் தெரிவிக்கின்றனர்.

இது இவ்வாறிருக்க பெருந்தோட்டத்துறையில் வாழும் தொழிலாளர்கள் சுகாதார ரீதியாக அதிகமாக பாதிப்புக்குள்ளாகி வருவதையும் காணக்கூடியதாக உள்ளது. தோட்டங்களை அரசு நடத்தி வந்தபோது தோட்ட வைத்தியசாலைகள் காணப்பட்டன. மருந்தக, தாதி, (நுஆயு) தோட்ட வைத்தியர்கள் போன்றோர் அநேகமான தோட்டங்களில் பிரசவ வார்ட் போன்ற காணக்கூடியதாக இருந்தமையும் சுகாதாரம் சீராக இருந்தமையும் குறிப்பிடுவதோடு வாரம் ஒரு முறையாவது தோட்டக் குடியிருப்புக்களுக்கு சேமநல அதிகாரி தோட்ட வைத்தியர் ஆகியோர் சென்று சுகாதாரம் சம்பந்தமாக கலந்துரையாடி வைத்தியம் பார்த்த காலமும் தோட்டங்களில் இருந்து வந்தது.

அது மட்டுமல்லாமல் சகல தோட்டக் குடியிருப்புக்களின் வடிகான் மற்றும் குடியிருப்பினை சுத்தம் செய்வதற்காக லயன் சுத்திகரிப்பாளர் ஒருவரும் கடமையில் இருந்து வந்ததும் குறிப்பிட வேண்டும். தற்போது தனியார் கம்பனிகளின் வருகையின் பின்னர் இவை படிப்படியாக குறைவடைய ஆரம்பித்து விட்டன. தோட்டப் பகுதிகளில் உள்ள வைத்தியசாலைகள் இயங்குவது குறைவு பல தோட்டங்களுக்கு ஒரு வைத்திய அதிகாரியொருவர், தாதி ஒருவர் என மிகவும் குறைவாகவே காணப்படுகின்றனர். சில தோட்டங்களில் மருந்தகம், வைத்தியசாலைகள் மூடப்பட்ட நிலையில் காணக்கூடியதாக இருப்பது வேதனையாகத்தான் இருக்கின்றது.

தற்போது வைத்திய அதிகாரி, தாதிமார், சேமநல அதிகாரி போன்றோர் தோடடக் குடியிருப்புக்களுக்கு விஜயம் செய்து நோயாளிகளை பார்வையிடுவது அடியோடு இல்லாமல் போயுள்ளது. அன்றிருந்த லயன் சுத்திகரிப்பாளர்கள் எந்த தோட்டத்திலும் இல்லை என்பதைத்தான் கூற வேண்டும். இப்படி கம்பனி வருகையின் பின்னர் பெருந்தோட்டத்துறை தொழிலாளிகளின் சலுகை படிப்படியாக குறைந்து வருகின்றது. அத்தோடு தொழிலாளர்களின் சந்தாவிற்கு அக்கறை காட்டும் தொழி;ற்சங்கங்களின் வருகை அதிகரித்துக் கொண்டிருக்கின்றமை குறிப்பிடத்தக்கதாகும்.

இவ்வாறு அதிகரித்து வரும் தொழிற்சங்கத் தலைவர்கள் மற்றும் அரசியல் தலைவர்கள் தொழிலாளர்கள் நலனிலும் சற்று அக்கறை காட்டு இதுவரை கிடைத்து வந்த சலுகையாவது குறையாமல் இருக்க வேண்டி தொழிலாளர்கள் கேட்கின்றனர்.

சுகாதார அமைப்புக்கள் தோட்டப் புறங்களில் சுகாதார நலன்களில் அக்கறை காட்ட வேண்டும். சுகாதார விழிப்புணர்வு கருத்தரங்குகளும் நடத்தி தோட்டத்துறை தொழிலாளர்களின் உரிமைகளிலும் அக்கறை செலுத்த முன் வர வேண்டுமென பெருந்தோட்ட கடமையில் உள்ள தொழிலாளர்கள் கேட்கின்றனர்.

ராஜ்குமார்

தொழிலாளர் வர்க்க சக்திகளே பெண் விடுதலைக்கான இயக்கத்தை முன்னெடுக்க வேண்டும்.

சர்வதேச மகளிர் தினம் ஒவ்வொரு வருடமும் மார்ச் மாதம் 08ம் திகதி சர்வதேச ரீதியில் உணர்வு பூர்வமாக கொண்டாடப்பட்டு வருகிறது. சர்வதேச மகளிர் தினத்தை முன்னிட்டு உழைக்கும் பெண்களுக்கு வாழ்த்துக்களை தெரிவிப்பதோடு பெண் விடுதலைக்காக கோராடி அர்ப்பணித்த தலைவிகளுக்கும் விடுதலை போராளிகளுக்கும் புரட்சிகர அஞ்சலியை சமர்ப்பித்து அவர்களை நினைவு கூருவோமாக.

கம்யூனிஸ்ட் அறிக்கையும் பெண் விடுதலை இயக்கமும்

1848ம் ஆண்டு கம்யூனிஸ்ட் அறி;க்கையிலும் பின் சர்வதேச கம்யூனிஸ்ட் சோஷலிச இயக்கங்களிலும் பெண் விடுதலைக்கான கோஷங்கள் எழுப்பப்பட்டன. பல போராட்டங்களும் நடைபெற்றன. தொழிலாளர் தோழியர் கிளேரா ஷெட்கின் தலைமையில் உருவாகிய சோஷலிச பெண்கள் இயக்கம் பெண் விடுதலைக்காக அளப்பரிய சேவையாற்றியுள்ளது. சோஷலிச சக்திகளே பெண் விடுதலைக்கான போராட்டத்தை முன்னெடுத்து பல வெற்றிகளை பெற்றுள்ளன.

சமகால போராட்டங்கள்

சம காலத்திலும் பெண் விடுதலைக்கான போராட்டங்கள் தொடர்கின்றன. குறிப்பாக உழைக்கும் பெண்கள் உரிமைகளுக்கான போராட்டங்கள் தொடர்கின்றன. வர்க்கப் போராட்டத்திலிருந்து பெண் விடுதலை போராட்டத்தை பிரிக்க முடியாது.

அக்டோபர் புரட்சியும் பெண் விடுதலையும்

1817ம் ஆண்டு நவம்பர் மாதம் 07ம் திகதி மாமேதை லெனின் தலைமையில் சோவியத் ஒன்றியத்தில் அக்டோபர் புரட்சி வெற்றி பெற்றது. இந்த வெற்றியைத் தொடர்ந்து சோவியத் யூனியனிலும் சோஷலிச நாடுகளிலும் பெண்களுக்கு சம உரிமை வழங்கப்பட்டது. சகல துறைகளிலும் பெண்கள் சம உரிமை பெற்றனர். இதன் தாக்கம் மேலை நாடுகளில் எதிரொலித்தது. அங்கேயும் பெண் விடுதலை இயக்கங்கள் வளர்ந்தன. பெண்கள் பல்வேறு உரிமைகளை வென்றனர். பிரபுத்துவ பழைய கலாச்சாரம் தகர்ந்தது. ஆனாலும் மூன்றாம் உலக நாடுகளில் பெண் விடுதலை தீவிரமாக பரவவில்லை.

மார்க்ஸிசம், லெனினிசம் பெண் விடுதலைக்கு உந்து சக்தியாக விளங்கின.

மூன்றாம் உலக நாடுகளில் தொடரும் பிரபுத்துவ பழைய கலாச்சாரம் ஆதிக்கமும் பெண் விடுதலையை, சமத்துவத்தை தடுக்கிறது. ஆகவே பிரபுத்துவ மத, முதலாளித்துவ ஆதிக்க சிந்தனைகளுக்கு எதிராக போராடாமல் பெண் விடுதலைக்கான இயக்கம் வேகமாக வளர முடியாது.

பெண்களின் உடை

தேயிலைத் தோட்ட தமிழ் பெண்கள் முதலில் தமது தற்போதைய ஆடை அணியும் முறையை மாற்ற வேண்டும். சேலை, படங்கு, றப்பர் சீட் போன்றவற்றை இல்லாதொழிக்க வேண்டும். பிரபுத்துவ காலனித்துவ ஆடை அணியும் கலாச்சார நிலையிலிருந்து மாறி நவீன யுகத்திற்கு வர வேண்டும். டெனிம் காற்சட்டை(லோங்ஸ்) கோட்டு, தொப்பி, கையுறை காலுக்கு பூட்ஸ் அணியும் நிலைக்கு மாற வேண்டும். தலையில் கூடை சுமக்கும் முறையை மாற்ற வேண்டும். கூடை காலாச்சாரமும் தகர்க்கப்பட வேண்டும். இது பற்றி செங்கொடிச் சங்கம் பல ஆண்டுகளாக பிரச்சாரம் செய்த போதும் பலனில்லை.

மேல்தட்டு மத்தியதர வர்க்க கலாச்சாரம்

கல்வியறிவு இல்லாததனாலேயே பெருந்தோட்ட தமிழ்ப் பெண்கள் மூட நம்பிக்கையில் வாழ்கிறார்கள் என்பதில் உண்மையில்லை. உதாரணமாக கல்வித் துறையில் சேவை செய்யும் படித்த பெண்களும், பழைய கலாச்சாரத்தையே பின்பற்றுகின்றனர். தற்போது தொலைகாட்சி கலாச்சாரத்தை மத்திய வர்க்க தமிழ்ப் பெண்கள் பின்பற்றுகின்றனர். வருமானத்தின் பெரும் பகுதியை அழகு சாதனங்களுக்கு தலை அலங்காரத்திற்கு மத சடங்குகளுக்காக என செலவிடுகின்றனர். தொழில்களில் நிறப் பாகுபாடு பின்பற்றப்படுகிறது. கருமை நிறமான பெண்கள் புறக்கணிக்கப்படுகின்றனர்.

ஐக்கிய நாடுகள் சபையின் பிரகடனம்.

ஐக்கிய நாடுகள் சபை 1997ம் ஆண்டு சர்வதேச பெண்கள் தினமாக மார்ச் 08ம் திகதியை பிரகடனப்படுத்தியவுடன் முதலாளித்துவ அரசாங்கங்களும் மத்திய தர பெண்கள்அமைப்புக்களும் சர்வதேச பெண்கள் தினத்தை கொண்டாடுவதில் தமது ஆதிக்கத்தின் கீழ் கொண்டு வந்து சர்வதேச பெண்கள் தினத்தின் வர்க்க குணாம்சத்தை மழுங்கடிக்கும் முயற்சிகளில் ஈடுபட்டன. வர்க்கப் போராட்டத்திலிருந்து பெண் விடுதலையை பிரிக்க முடியாது. உதாரணமாக சிறிமாவோ பண்டாரநாயக்காவும், சந்திரிகா குமாரதுங்காவும் பிரதமராக, ஜனாதிபதியாக பதவி வகித்த போதிலும் இலங்கையின் தொழிலாள விவசாய பெண்கள் விமோசனம் பெறவில்லை. தொழிலாளர் வர்க்க சக்திகளே பெண் விடுதலைக்கான இயக்கத்தை முன்னெடுக்க வேண்டும். மார்க்ஸிய சிந்தனையை வர்க்கப் போராட்டத்தை முன்னெடுக்க வேண்டும் என்று குறிப்பிட்டுள்ளது.

சர்வதேச பெண்கள் தினத்தின் அறைகூவல்.

சர்வதேச பெண்கள் தினத்தை கொண்டாடும் பெண்கள் அமைப்புக்கள், பெண்கள், பகுத்தறிவு, பரட்சிகர படலத்தி;ல் அணிதிரள வேண்டும் கார்ல் மார்க்ஸ், பெரியார் ஆகியோர் உட்பட புரட்சிகர சீர்திருத்த கருத்துக்களை படித்து விழிப்புணர்வு பெற வேண்டும்

ஓ.ஏ. இராமையா

செங்கொடி சங்கம்

மகளிர் தினமும் மலையகப் பெண்களின் மேம்பாடும்

வேண்டுவதை வேண்டாமென்று தடுக்கும் போதுதான் வேட்கை அதிகரிக்கிறது. அதுதான் ஆசைகளை அறுப்பதற்கு பதிலாக தானாகவே அவ்வாசைகள் அறுந்து விடுகின்றன. நிஜங்களைக் கண்டு அவற்றின் மதிப்பீடுகளை உணர்ந்தால் தான் உண்மை உள்ளத்தை உலுக்கும்.

மலையகப் பெருந்தோட்ட பெண்களின் பின்புலத்திலும் பல்வேறு உண்மைகள் மறைந்து புதைந்து கிடக்கின்றன. ஆனால் இதனை உணர்ந்து கொள்ளாத பல சக்திகள் கட்டியுள்ள கட்டுமானங்களை அவிழ்ப்போம். அடிமைத்தனத்திலிருந்து அவர்களை விடுவிப்போம் மற்றும் விடுதலை விடிகிறது என்றெல்லாம் ஆண்டுக்கொருமுறை ஆலாபனை வார்த்தை சொல்லுவதை மாத்திரம் தாரகமாகக் கொண்டுள்ளன. இன்றைய மகளிர் தின கொண்டாட்டமும் மேற்கூறியவற்றை மெய்ப்பிக்கும் என்பதில் ஐயமில்லை.

மலையகப் பெண்களின் மேம்பாடு பற்றிப் பேசும் போது அந்தப் பெண்கள் எழுப்புகின்ற கேள்விகள் நினைவுக்கு வருகின்றன.

எண்ணற்ற இளம் பெண்களின் இந்த இயல்பான ஏக்கத்தை நோக்கின் பரிதாபப் பிறவிகளாக பார்க்கப்பட வேண்டியவர்கள் எல்லாருமல்லர். ஆனால் கல்வியில் பின்தங்கி காலத்தின் கட்டாயத்ததால் சமூகப் பொருளாதார சுமைகளிலிருந்து விடுபடுவதற்கு உழைப்பையே தஞ்சமாகக் கொண்டிருக்கும் பெருந்தோட்டப் பெண்களைப் பற்றித்தான் கவனம் செலுத்த வேண்டிய கட்டாயம் நிலவுகிறது.

வளர்ந்து வருகின்ற இந்தச் சமுகம் இன்னுமொரு பெண்ணின் உரிமையை கொடுக்க மறுப்பதால்தான், உழைக்கும் பெண்களின் மாண்பு உதாசீனப்படுத்தப்படு கிறது. பெருந்தோட்ட பெண்களும், இந்த வேள்விப் பட்டியலில் கேள்விப் பொருளாக மாறியுள்ளனர். நிறைந்த உழைப்பு, குறைந்த வருமானம், செறிந்த அடிமைத்தனம், இதுவரை வாழ்க்கை என்ற ஏக்கப் பிரவாகம் இவர்களின் வெளிப்படாத வேதனையாக நிறைந்து நிற்கிறது. நாட்டிலுள்ள எல்லாப் பெண்களுக்கும் ஒரே மாதிரியான சமூக நீதியே காணப்படுகின்ற போது பெருந்தோட்டப் பெண்களும் அதற்குள் தானே அடங்குகின்றார்கள் என்ற சிலரின் நியாயப்படுத்தல்கள் தொடரக்கூடும். எனினும் பெருந்தோட்டப் பெண்கள் ஆணாதிக்கம், சம உரிமையின்மை, பாரபட்சம், பாதுகாப்பின்மை, சந்தேகம், வரதட்சிணை, பாலியல் வன்புணர்ச்சி, அடக்குமுறை அதிகாரம், உலகமயதாக்கம், சட்டவிரோத மது தயாரிப்பின் பாதிப்பு போன்ற காரணங்கள் முழுவாசியை முதன்மையாகிக் கொள்வதில் முக்கிய இடம் பெறுகின்றனர் என்பதை பெருந்தோட்ட பெண்களிடையே நடத்தப்பட்ட ஆய்வுகள் உறுதிப்படுத்துகின்றன.

பெண்ணியம் என்னும் கருத்தியல் பிரெஞ்ச் சமூகவியலாளர் சார்லஸ் போரியர் (விhயசடலீள பிழரசiலீச) என்பவரால் உருவாக்கப்பட்டது. அவர், தன்னையும் உருவாக்கிக்கொண்டு ஒரு மாறுபட்ட சமுதாயத்தின் உருவாக்கத்திற்க்கும் பங்களிக்கும் பெண் உருவத்தை ‘புனித பெண்மை’ என அடையாளம் காட்டினார். அப்படியானால் தேசத்தின் மாறுபட்ட பொருளாதாரத்திற்கு தன்னை அர்ப்பணமாக்கும் பெருந்தோட்டப் பெண் தொழிலாளியும் இந்த புனிதத்துக்குள் புதைந்து கொள்கிறாள் எனலாம்.

17ம் நுற்றாண்டில் இங்கிலாந்து நாட்டில் ஆரம்பிக்கப்பட்ட பெண்கள் இயக்கத்தின் வியாபகமே இன்றுவரை பெண்ணியம் பற்றி பேசிக்கொண்டிருக்கின்றது. இந்த வரிசையில் மலையகப் பெருந்தோட்ட பெண்கள் பற்றி அமைப்பு ரீதியாக தொழிற்சங்கங்கள், அரச சார்பற்ற நிறுவனங்கள், பெண்கள் அமைப்புக்கள் என்பன தவறாமல் பேசிக்கொண்டிருக்கின்றன. அதிகமான அமைப்புக்கள் பெருந்தோட்டத் தொழிலாளர்களின் வாழிவியலோடு ஒன்றிப்போய் கரிசனை காட்டத் தவறினாலும், அவர்கள் பற்றிய விடயங்களை ஊடகங்களில் வெளியிட்டு உலகுக்கு தெரிவிக்க மறந்ததில்லை. எது எப்படியாயினும்,

என்று நீங்குமோ எங்களின் கொடுமைகள்?

எப்போது மலருமோ விடுதலைப் பூக்கள் என்ற கேள்வியோடு வாழும் தோட்டப் பெண்கள் மாறுபட்ட சூழலில் வாழுகின்ற தன்மையினை கவனத்திற்கொள்ள வேண்டியது காலத்தின் கட்டாயமாகும்.

இலங்கையைப் பொறுத்தளவில் சார்க் வலய நாடுகளுடன் ஒப்பிட்டுப் பார்த்தால் இலங்கைப் பெண்களின் வாழ்வியல் பின்னணி சற்று திருப்திகரமாகவே இருக்கின்றது. என்றாலும் பெருந்தோட்டப் பெண்கள் இன்னும் பிற்படுத்தப்பட்டவர்களாகவும் புறக்கணிக்கப்பட்டவர்களாகவுமே உள்ளனர். அநீதிகளுக்கு ஆளாகி வரும் இவர்கள் நாட்டின் அபிவிருத்திக்காக அளித்து வருகின்ற பங்களிப்பு கண்டுகொள்ளப்படாததாக இருந்து வருகின்றது.

இன்றைய சமூக பொருளாதார காரணிகளாலும் பெருந்தோட்டங்களில் இருந்து ஆண் தொழிலாளர்கள் படிப்படியாக வெளியேறி வருவதனாலும் ஆண் தொழிலாளர்கள் மேற்கொண்ட பல்வேறு கடமைகளை தாமே மேற்கொள்பவர்களாக மாத்திரமின்றி பெருந்தோட்டத்தில் எஞ்சியவர்களாகவும் பெண்களே விளங்குகின்றனர் எனலாம். இதனால் அவர்கள் குடும்பத்தில் பிரதான வருவாய் ஈட்டுபவர்களாகவும் ஓய்வுபெற்ற தமது குடும்ப அங்கத்தவர்களை பராமரிக்கக் கூடியவர்களாகவும் தனது குழந்தைகளை பராமரிக்க வேண்டியவர்களாகவும், எல்லாவற்றுக்கும் மேலாக நேரத்தோடு போராடுபவர்களாகவும், விறகு சேர்த்தல் முதல் வீட்டிற்கு பொருட்கள் கொள்வனவு செய்வது வரை கவனிக்க வேண்டிய கடமைகளை கொண்டவர்களாகவும் விளங்க வேண்டியுள்ளது. ஓய்வில்லாமல் உழைக்கும் பெருந்தோட்ட பெண்ணைச் சுற்றியிருக்கிற வலைப்பின்னல்கள் வறுமைப் பின்னல்களாகவும், வெறுமைப் பின்னல்களாகவும் விளங்குகின்றன.

அடிப்படைக் கல்வியில் அபிவிருத்தி பெறாத இவர்கள் ஒடுக்குமுறைக்கு உட்பட்டிருப்பதால் அரசியல், தொழிற்சங்கம், ஆலயம், சமூகப் பிரதிநிதித்துவம் என்பவற்றிலும் பின்தங்கியவர்களாகவே இருக்கின்றனர்.

மேலும் இவர்களுக்கு குறைவான போதிய சத்துணவின்மை, குடும்பத்தவர்களில் ஆண்களின் மதுப் பாவனை, பொருளாதார தாக்கம் போன்ற பல்வேறு காரணிகள் சுமைகளாகி வருகின்றன. பொதுவாக தொழில் பாதுகாப்பு, தமக்கான சீருடை, வேலைத்தளத்தில் எந்தவொரு அடிப்படை வசதிகள் இல்லாமையாலும், பெண்களை நிருவகிக்கும் பெண் நிருவாகிகள் இல்லாமலும் ஓரங்கட்டப்பட்டதொரு ஒடுக்குமுறைச் சின்னமாகவும் விளங்குகின்றனர். ஏனைய துறையினரோடும், சமூகங்களோடும் தொழில் ரீதியாகவும் ஒப்பிடும் போது எல்லா வகையிலும் பால்நிலை சமத்துவமற்ற நிலையில் பரிதாபத்துக்குரியவர்களாகவே விளங்குகின்றனர்.

ஆகவே பெருந்தோட்ட சமுதாயப் பெண்கள் மாண்புற்று வாழ்வதற்கு இவ்வருட மார்ச் 08ம் திகதி பெண்கள் தினமாவது ஒரு புரட்சிகரமான முன்னுருவாக்கத்தை உருவாக்குமேயானால் அதுவே அவர்களை ஒதுக்கலிலிருந்தும், ஓரங்கட்டலிலிருந்தும் மீட்டு சிந்தனை உசுப்பலுக்கு வித்திடும் என்பதில் ஐயமில்லை.

ஓ தோட்டப் பெண்ணே!

ஆடிவரும் தென்றலும்

பாடி வரும் பறவையும்

ஓடிவரும் அருவியும்

உலகத்தில்

சுதந்திரமாக சுவடு பதித்ததைப் பார்!

நீ! இயற்கையின் சிகரமல்லவா!

உன் அறியாமைச் சிறையை விட்டு

வெளியே வா!

கட்டுக்களை உடைத்தெறி - ஏன்

உடைத்து எரி!

அப்போது விடுதலை தேடும் உனக்கு

வானம் கூட

தொடு தூரத்தில் எரியும் என்பது போல்

மலையக பெருந்தோட்ட பெண்கள் அறியாமையை கட்டவிழ்த்து உணர்வுகளில், எண்ணங்களில் சொற்களில், செயல்களில், வாழ்க்கையில் நம்பிக்கையோடு விடுதலை தேடும் நாள் உதயமாக சர்வதேச மகளிர் தினம் அடிகோலட்டுமாக!

பசறையூர்

க. வேலாயுதம்

நன்றி- தினகரன் வாரமஞ்சரி